12 сакавіка адбыліся здымкі канцэртнай праграмы "Stabat Mater", якая стане святочным падарункам усім вернікам напярэдадні Вялікадня 20 красавіка. Вядомы рэлігійны твор на музыку Франсіса Пуленка прагучыць у эфіры тэлеканала “Беларусь 3” у выкананні заслужанага калектыву Рэспублікі Беларусь “Акадэмічны хор Белтэлерадыёкампаніі” і сімфанічнага аркестра Белтэлерадыёкампаніі. Дырыжор - Вільгельм Кайтэль.
Вядома больш за 200 варыянтаў музычных кампазіцый на сярэднявечны каталіцкі тэкст "Stabat Mater". Сярод кампазітараў XVII-XIX стагоддзяў, якія звярталіся да гэтага твора, - Вівальдзі, Пергалезі, Гайдн, Шубэрт, Рассіні, Дворжак, Вэрдзі. Адным з кампазітараў ХХ стагоддзя, які напісаў кантату "Stabat Mater" для пяцігалоснага хору і аркестра, з’яўляецца французскі піяніст і музычны крытык Франсіс Пуленк. Ён абапіраўся на традыцыйны жанр і стварыў, па яго словах, “заступніцкую малітву” ў дванаццаці частках.
Музычную праграму Франсіса Пуленка "Stabat Mater" у студыі Белтэлерадыёкампаніі “600 метраў” выканалі сімфанічны аркестр і акадэмічны хор медыяхолдынга. Ім удалося перадаць драматургію, закладзеную кампазітарам, праз узаемадзеянне двух калектываў. Хор выступіў цудоўным абрамленнем сімфанічнага аркестра. Малітоўны характар твора перадалі павольны тэмп некаторых частак і спевы хору без аркестровага суправаджэння. Акрамя таго, у канцэрце ўдзельнічала салістка Нацыянальнага акадэмічнага Вялікага тэатра оперы і балета Ірына Кучынская, вядомая па ролях у спектаклях “Чароўная флейта” і “Травіята”.
Дырыжыраваў сімфанічным аркестрам і хорам Белтэлерадыёкампаніі Вільгельм Кайтэль, з якім медыяхолдынг даўно і плённа супрацоўнічае. Нагадаем, што менавіта нямецкі дырыжор і імпрэсарыа займаўся арганізацыяй сумеснага праекта Белтэлерадыёкампаніі з легендарнай групай Rammstein. На яго рахунку тур "Disney in concert" з сімфанічным аркестрам медыяхолдынга, музыканты якога выканалі шэраг кампазіцый з вядомых анімацыйных фільмаў. Разам з акадэмічным хорам Белтэлерадыёкампаніі летась Вільгельм Кайтэль гастраляваў з праграмай "Zimmer Tour" па Швейцарыі, Аўстрыі і Гераманіі ды плануе прадоўжыць канцэртны тур сёлета.
Тэлеканал “Беларусь 3” зробіць сапраўдны падарунак сваім гледачам напярэдадні Вялікадня, калі яны змогуць пачуць у жывым выкананні вядомы твор Франсіса Пуленка "Stabat Mater". Акрамя таго, іх чакаюць традыцыйныя жывыя трансляцыі богаслужэнняў, шэсцяў, пасланняў і благаславенняў Папы Рымскага Францыска з Ватыкана і тэматычныя выпускі праграм у гэтыя святочныя дні.
