29 чэрвеня "Беларусь 3" упершыню пакажа спектакль Нацыянальнага акадэмічнага драматычнага тэатра імя Максіма Горкага "Пане Каханку". Гэта мастацкая выдумка драматурга Андрэя Курэйчыка, у цэнтры якой - рэальная гістарычная асоба, беларускі магнат Караль Станіслаў Радзівіл.
"Пане Каханку" - адна з самых відовішчных і яркіх пастановак у рэпертуары тэатра з удзелам вядомых майстроў сцэнічнага мастацтва - Валерыя Шушкевіча, Сяргея Юрэвіча, народнай артысткі Беларусі Бэлы Масумян, заслужанага артыста Рэспублікі Беларусь Аляксандра Суцкавера і іншых.
Дзеянне спектакля адбываецца ў XVIII стагоддзі, пасля I падзелу Рэчы Паспалітай. Галоўны герой Караль Станіслаў Радзівіл атрымаў сваю мянушку Пане Каханку таму, што да ўсіх менавіта так па-добраму і звяртаўся - "пане каханку", гэта значыць "мой дарагі".
Караль Станіслаў Радзівіл - адзін з самых уплывовых магнатаў Вялікага Княства Літоўскага, неардынарная асоба, значная фігура ў нашай гісторыі. Далёка не ўсе згодныя з трактоўкай вобраза галоўнага героя. Уладны, жорсткі магнат, у якога пазычалі грошы каралі, быў закаханы ў простую сялянку? Марыў навучыць беларусаў лётаць? Аднак і гледачы, і крытыкі сыходзяцца ў адным: гэтая пастаноўка - выдатная падзея не толькі ў рэпертуары тэатра імя Горкага, але і наогул на беларускай тэатральнай сцэне.
Гледачы тэлеканала "Беларусь 3" убачаць спектакль "Пане Каханку" ў суботу, 29 чэрвеня, а 22:40.