21 лютага ва ўсім свеце па ініцыятыве ЮНЕСКА адзначаецца Міжнародны дзень роднай мовы. Тэлеканал "Беларусь 3" далучаецца да акцыі і ў гэты дзень прапануе сваёй аўдыторыі цалкам беларускамоўны эфір з лепшымі тэлепраектамі ўласнай вытворчасці, мастацкімі і дакументальнымі стужкамі на роднай мове.
У пятнічнай праграме "Беларусь 3" гледачоў чакаюць выпускі пазнавальных праектаў, якія адлюстроўваюць самыя розныя бакі нашай спадчыны. Так, праграма "Жывая культура", якая распавядае пра нематэрыяльныя гісторыка-культурныя каштоўнасці беларусаў, а 07:35 пакажа традыцыйны вясельны каравай на Ваўкавышчыне, а праект "Артэфакты", што разам з гісторыкамі, археолагамі, краязнаўцамі і калекцыянерамі раскрывае гісторыю матэрыяльных артэфактаў, а 10:00 распавядзе пра Статут Вялікага Княства Літоўскага.
А 10:25 гледачы дзякуючы "Архітэктуры Беларусі" апынуцца ў сядзібе Агінскіх, а "Народны майстар", адна з навінак тэлесезона 2019/2020, прысвечаная сябрам Саюза майстроў Беларусі, а 15:40 прапануе бліжэй пазнаёміцца з жыццём і творчасцю вядомай ткачыхі традыцыйнага беларускага адзення Людмілы Кавалёвай.
Увечары а 23:05 гераіняй фільма-партрэта пра таленавітую беларускую моладзь з цыкла "На вышыні" стане паэтэса Кацярына Масэ, а пасля дакументальны тэлефільм "Майстэрня. Гісторыя аднаго мастака" распавядзе пра творчы лёс сучаснага мастака Паўла Татарнікава.
Сярод фільмаў, якія тэлеканал прапануе да прагляду ў адметны дзень шанавання роднай мовы, - гістарычная драма "Анастасія Слуцкая" ("Беларусьфільм", 2003), народная камедыя "Свежына з салютам" ("Беларусьфільм", 2001), дакументальныя стужкі "Залатыя рыбкі музыкі Станіслава Манюшкі" (Белтэлерадыёкампанія, 2019) да 200-годдзя кампазітара і "Мяжа" ("Беларусьфільм", 2019). Усе фільмы канал адмыслова пакажа на беларускай мове.
Акрамя таго, а 18:45 гледачы ўбачаць юбілейны творчы вечар заслужанай артысткі Рэспублікі Беларусь Тамары Міронавай, запісаны медыяхолдынгам 9 лютага ў Купалаўскім тэатры. Праграму вечара складаюць фрагменты спектакляў з удзелам шаноўнай імянінніцы.
Таксама адзначым, што 21 лютага сацыякультурны тэлеканал павіншуе народнага артыста Беларусі дырыжора Міхаіла Фінберга з днём нараджэння - а 12:20 маэстра стане шанаваным госцем праекта "Майстры і куміры", а адразу пасля гледачоў чакае канцэртная праграма "Купала і Колас. Вы нас гадавалі" Нацыянальнага акадэмічнага канцэртнага аркестра Беларусі пад кіраўніцтвам Міхаіла Якаўлевіча.